Imam Abu Hanifah (rahimahullah) Ka Qoul Kya Hai.?

Bismillaahir Rahmaanir Raheem (14-05-2014)

Aitraaz: Muqallid Ki Daleel Sirf Us ke Imaam Ka Qoul hota hai. Lihaaza Wo Qur’an aur Ahaadees Daleel me peish nahi kar sakta..

Al-Jawaab: Firqa Ahl-e-Hadees ke Juhala’ to Juhala’ balke In ke Ulema’ ko bhi Itni Jurrat nahi hai ke Muqallideen se Dala’il-e-Shar’iyah (Ya’ni Qur’an, Ahaadees, Ijma’ aur Qiyaas) se Jawaab ka mutaalbah karei’n. Isliye Bachkaanah Harkaat per utar aate hain aur Jab koi Muqallid Inhei’n Jawaab Dalaa’il-e-Shar’iyah se deta hai to fauran Ye Aitraaz kar dete hain ke, Tumhaare Fala’n Aalim ne likha hai ke “Muqallid ki Daleel sirf Qoul-e-Imaam hai.”

Ye sab isliye kiya jaata hai taa ke Ghair-Muqallideen ka Dajal wa Fareib Logo’n ke saamne Zaahir na ho Jaaye kyonke Ye Log Ab tak Ye Jhoot bolte aaye hain ke Fiqh Hanafi Qur’an wa Ahadees ke khilaaf hai lekin Muqallideen Fiqh Hanafi ke Masaa’il ko Qur’an wa Ahadees se saabit kar dete hain to phir Ye log apne Jhoot se bach nikalne ke liye kehte hain “Tumhaari Daleel sirf Qoul-e-Imaam hai, lihaaza Qur’an wa Hadees peish nahi kar sakte.”

Ma’loom hota hai ke Firqah Ahl-e-Hadees ka asal Maqsad to Muqallideen ko Qur’an wa Ahaadees per amal karne se rokna hai.

Qoul-e-Imaam Kya Hai.?

Chaliye Hum maan lete hain ke Muqallid ke liye Qoul-e-Imaam hi hujjat hai. Aur Qoul-e-Imaam mustanbat Kis se hai Ye Hamaare Imaam ki Zubaani parh lijiye…

Yahya bin Zarleis (rahimahullah) ne farmaaya ke Main Sufyan Sauri (rahimahullah) ki Khidmat me tha ke Ek Zi-ilm Ibaadat guzaar Shakhs aaya aur Sufyan Sauri (rahimahullah) se arz kiya: Ae Abu Abdullah.! Abu Haneefah (rahimahullah) ki Kis baat per Aap Naraaz hain.? Unhoney farmaaya: Unki kya baat hai.? Us Buzrug ne arz kiya: Maine to Unsey Insaaf ki baat suni hai, wo keh rahe the ke, Pehle Main Allah ki Kitaab (Qur’an) ko leta hoon, Pas Isme Agar Masla’h Na mile to Rasoolullah (sallallahu alaihi wa sallam) ki SUNNAT ko leta hoon. Agar SUNNAT-E-NABAWI (sallallahu alaihi wa sallam) me bhi Masla’h Na mile to Sahaaba-e-Kiraam (raziallahu ta’la anhum) ke Aqwaal leta hoon, Agar wo Mukhtaleef ho (Ya’ni Ikhtilaaf ki soorat me) Kisi Ek Qoul ko leta hoon albattah in ke Aqwaal se baahar nahi jaata ke in ka Qoul chhor kar kisi aur ka Qoul ikhtiyaar karoo’n aur agar in ke Aqwaal bhi nahi milte aur Mu’aamlah Ibraheem Naqa’i, Shu’ba, Ibne Sireen, Hasan Basri, Ata’ bin Abi Rabaah aur Sayeed bin Musayyab wagherah (Taaba’een rahmatullahi alaihim) tak pohnche to Main Khud IJTIHAAD karta hoon Jaisa ke In Hazraat Taaba’een ne Ijtihaad kiya. Yahya bin Zarleis (rahimahullah) ne farmaaya: Sufyan Sauri (rahimahullah) Ye sun kar Chup ho gaye. [Tareekh Baghdaad, Sanad Sahih]

Scan:

image

Ma’loom hua ke Imaam ka Qoul Wo hai Jo Qur’an, Ahaadees aur Aasaar-e-Sahaaba me hai. Aur Inme na milne ki soorat me Imaam ka Qoul Qur’an wa Ahaadees se maakhooz Fiqhi Usoolo’n per mabni hota hai. (Ma sha’ Allah)

Isiliye Muqallideen Dalaa’il-e-Shar’iyah se Jawaab dete hain. Aur aisa karne se Imaam Sahab (rahimahullah) ke Qoul ki Hujjiyat Khatm bhi nahi hoti.

Note: Imaam Abu Haneefah (rahimahullah) Khud Taaba’i the isliye wo Doosre Taaba’een (rahmatullahi alaihim) ka Ijtihaad Qubool karne ke bajaaye Khud Ijtihaad karte.

Allah Ta’la se dua hai ke Humei’n Deen ki Sahih Samajh ata farmaaye. Fitna baaz logo’n ke Wasaawis se hamaari hifaazat farmaaye. (Aameen)

Min-Jaanib: Sameer Mughal

Advertisements
This entry was posted in Akaabir-e-Ummat, Difa Fiqh-e-Hanafi and tagged , , , , , , , , , . Bookmark the permalink.