Isaal-e-Sawaab per Ek Mukhtasar Mukaalma

Bismillaahir Rahmaanir Raheem (16-10-2014)

Ghairmuqallid: Assalamu’alaikum Warahmatullahhi Wabarakatuh

Sunni: Wasalamu’alaikum Warahmatullahi Wabarakatuh

Ghairmuqallid: Janab Aaj Aapse Ek Masla Mai Guftgu Karna Hai Aur Yakeen Hai Jaisa Ke Humare Shaykh Ne Kaha Aap La-Jawab Hojayenge.

Sunni: Aapke ‘Shaykh Chilli’ Ne Fir Naya Waswasa Choda Hai Kia?

Ghairmuqallid: Pehle Aap Baat to Kijye. Humar Shaykh Kehte Hai Isaale Sawaab Aql, Insaaf Aur Daleel Ke Khilaaf Hai.

Sunni: Isale Sawaab Kise Kehte Hai?

Ghairmuqallid: Hmmm…..Aap Karte Ho; Aap Aap Batao!

Sunni: Bhai Isaale Sawaab Ka Matlab Apne Kisi Kaam Ka Sawaab Murdah Ko Pohchana. Ye Amal Ahle Sunnat Wal Jamat Ke Yahan Jayez Hai Aur Qur’an Kareem Ki Ayaat Aur Ahadees Se Sabit Hai. Aap Khud Kamate Ho Aur Fir Apne Paise Kisi Ko De Do, Wo Use Faidah Utha Sakta Hai Ya Nahi?

Ghairmuqallid: Wo Aqli Daleel to Thik Hai Lekin Quran Mai Aya Hai…

“Aur Aadmi Ko Wahi Milta Hai Jo Usne Kamaya” [Surah An-Najm:39]

Sunni: Janab Qura’n To Ye Ayat Bhi Hai:

“Ya Rabb! Jis Tarha Unhone Mujhe Bachpan Mai Pala Hai, Aap Bhi Unke Saath Rehmat Ka Mu’amla Kijye.” [Surah Bani Israel: 24]

Kia Waldain Ke Liye Ye Dua Karne Ka Hukum Hai?

Ghairmuqallid: Jee Bilkul Hai.

Sunni: Ba-hayaat Aur Marne Ke Baad Bhi…?

Ghairmuqallid: Haa Haa Humne Kab Inkar Kia.

Sunni: Kia Is Dua Se Unhe Kuch Faidah Bhi Pohchega Ya Qur’an Qareem Be-Faidah Wali Kaam Ka Hukm Deta Hai?

Ghairmuqallid: Arey Bhai Bilkul Faidah Pohchega! Isme Bhala Kia Shak Hai?

Sunni: Janab Isi Ko Isale Sawaab Kehte Hai.

Ghairmuqallid: Lekin Humare Shyakh Kehte Hai Ye Dua Aulad Ke Liye Khaas Hai Kyu Ke Wo Dunya Mai Apne Waldain Ke Zariye Ata Hai, Isliye Aulad Isaale Sawab Karsakte Hai.

Sunni: Qura’n Paak Main Hazrat Nooh (Alaihis-Salat Was-Salam) Ki Dua Suniye:

“Mere Parwadigar! Meri bhi Bakshish Farmadijye, Mere Waldain Ki bhi, Har Us Shaksh Ki Jo Imaan Ki Halat Mai Mere Ghar Mai Dakhil Hua Hai, Aur Tamam Momeen Mard Aur Aurto’n Ki bhi. Aur Jolog Zalim Hai; Unko Tabahi Ke Siwa Koi Aur Cheez Ata Na Farmaiye.” [Surah Nooh:28]

Ab Batao Bhai Kia Hazrat Nooh (Alaihis-Salat Was-Salam) Ki Ye Dua Unke Waldain Ke Siwa Baki Unke Ghar Main Dakhil Hone Wale Imaan Walo’n Ke Liye Faidah Mand Hai Ya Nahi?

Ghairmuqallid: Jee Bilkul Faidamand Hai.

Sunni: Kia Tamam Momeen Mard Aur Aurat Ke Liye bhi Faidamand Hai?

Ghairmuqallid: Jee Ha Hai.

Sunni: Yahi Isaale Sawab Hai.

Ghairmuqallid: Lekin Ye Dua Ke Silsile Hai. Aaplog Jo Quran Kareem Se Surah Ya Ayaat Padh Kar Isaale Sawab Karte Hai Iski to Koi Daleel Mojood Nahi. Humare Shyakh Ka Challenge Hai.

Sunni: Hazrat Al-Lajlaaj (Radhiallaahu Anhu) Kehte Hai Unke  Walid Ne Wasiyat Ki Thi Ke Jab Unka Intiqaal Hojaye Unke Sirhane Surah Baqrah Ki Shuru Aur Aakhri Ayaat Padha Jaye; Kyu Ke Unhone Nabi Kareem (Sallallahu Alaihi Wasallam) Aisa Kehte Hue Suna tha…..{Mukhtasar}

Is Waqia Ko Imam Tabrani (Rahimahullah) Ne Naqal Kia Hai Aur Imam Haythami (Rahimahullah) Kaha Iske Rizal Siqa Hai [Majma-uz-Zawaaid P.44/3]. Yani Ye Hadees Sahih Hai.

Aapke “Ghairmuqallid Allama” Shaukaani Bhi Iske Kahil Hai. Wo Farmate Hai:

“Aur Surah Yaseen Ka Sawab bhi Maiyet Ko Pohochta Hai Aulad Ki Taraf Se bhi Aur Ghair-Aulaad Ki Taraf Se bhi. Is Waste Ke Rasoolullah (Sallallahu Alaihi Wasallam) Farmaya Hai Ke Apne Murdoh Per Yaseen Padho. Aur Dua ka Nafah bhi Murdoh Ko Pohochta Hai Aulaad Dua Kare Ya Koi Aur.” [Fatawa Ulema-e-Hadees p.349/5]

Ghairmuqallid "Allama” Shaukaani aur Isaale Sawaab Bil Qur'an

Ghairmuqallid “Allama” Shaukaani aur Isaale Sawaab Bil Qur’an

Ab Kahiye Aap Ke Shaykh Sahab Aur Kia Kia Waswasa Dete Hai?

Ghairmuqallid: Sadqa Khairat  Jo Aaplog Karte Ho; Kia Iski Bhi Koi Daleel Mojood Hai?.

Sunni: Bhai Aaplog to Bukhari Shareef Ka Nara Lagate Ho. Kabhi Padhkar Amal Bhi Karliya Karo. Bukhari Shareef Mai Hazrat Abdullah bin Abbas (Radiallahu Anhu) Se Riwayat Hai Ke Hazrat S’aad bin Ubadah (Radiallahu Anhu) Ki Waldah Faut Hogayi Aur wo Ghayab Thay. Wo Hazir Hue Aur Arz Kia Ya Rasoollulah (Sallallahu Alaihi Wasallam) Meri Waldah Faut Hogayi Aur Mai Gayab Tha. Agr Mai Unki Taraf Se Sadqah Karu to Kia Unko Faidah Hoga? Aap (Sallallahu Alaihi Wasallam) Ne Farmaya Haa! Isper Hazrat S’aad bin Ubadah (Radiallahu Anhu) Ne Farmaya Aap (Sallallahu Alaihi Wasallam) Ko Gawah Banata Hu Ke Mera Baagh Mekhraaf Unki Taraf Se Sadqah Hai. [Bukhari p.387/1]

Aapke Bade Aalim Jinhe “Shaykulkul” Kaha Jata Hai Wo Ek Sawal Ke Jawab Mai Likhte Hai:

“Maiyet Ki Taraf Se Khairat Ki Jaye to Uska Sawab Bila-Subah Pohochta Hai.” [Fatawa Nazeeriya: p.715/1]

Ghairmuqallid Maulana Nazeer Hussain Dehelvi ke nazar Mai Isaale Sawab Bila-Subah Pohochta hai

Maulana Nazeer Hussain Dehelvi ke nazar Mai Isaale Sawab Bila-Subah Pohochta hai

Ghairmuqallid: Shaykh Sayed Nazeer Hussain Dehelvi Rahimahullah bhi Islaale Sawaab Ke Kahil thay?

Sunni: Aapke Manazir Maulana Sanaullah Amritsari Sahab bhi Isaale Sawaab Ko Sahi Maante thay. Dekhye Unki Tehqeeq. Wo Farmate Hai:

“Qirat Quran Se Isaale Sawaab Ke Mutalliq Baad-Tehqeeq Yahi Fatwa Hai Ke Agar Koi Shaksh Quran Mazeed Ki Tilawat Karke Sawab Maiyet Ko Bakshe to Uska Sawab Maiyet Ko Pohchta Hai; Ba-Shart Ke Padhne Wala Khud Ba-Gharz Sawab Beghair Kisi Rashm Riwaz Ki Pabandi Ke Padhe. [Fatawa Sanaiya: p.39/2]

Ghairmuqallid Ka Isaale Sawaab per "Tehqeeqee Fatwa"

Ghairmuqallid Ka Isaale Sawaab per “Tehqeeqee Fatwa”

Ghairmuqallid: Baat Aapki Bilkul Durust Mal’oom Hoti hai Magar Humare Shaykh…..

Sunni: Arey Mia Apke Shaykh Sahab Darasal Gumrah Firqa  Mu’tazila Ke Naqsh-e-Kadam per Chal Rahe Hai. Murdoh Ke Haq Main Zindah Logon Ki Dua Qubool Hoti Hai.

Kia Aapke Murdahlog Kafir Hote Hai? Agar Aisa Hai to Aap Apne Murdoh Ke Liye Na Dua Kare’n, Na Sadqa Kare’n aur Na Namaz Janah Padhe Kyu Janazah Ki Namaz darasal Dua hai:

“Aur Unmese Jo Koi Marjaye, to Tum Usper Kabhi Namaz (Janazah) Mat Padhna Aur Na Uski Qabr per Khade Hona. Yakeen Jano Ye Wo Log Hai Jinhone Allah Aur Uske Rasool Ke Saath Kufr Ka Rawaiyah Apnaya Aur Is Halat Mai Mare Ke Wo Na-Farman thay.  [At-Taubah: 84]

Isi tarha Hazrat Ibrahim (Alaihis-Salat Was-Salam) Ki Dua [Surah Ibrahim: 40-41] Dekhye. Hazrat Ibrahim (Alaihis-Salat Was-Salam) Ki Dua Qubool Ki Gayi Siwa Unke Walid Keliye Jo Kafir thay. Unke Haq Mai Isaale Sawab Nahi Kia Jasakta.

Aakhir Allah Rabbul Izzat Kafiro’n ke liye Dua se Kyu Roka? Darasal Namaz-e-Janazh Dua Hai Maiyet Ke Liye. Iska Faidah Maiyet Ko Pohochta Hai. Kafir’on Ke Liye Koi Isaale Sawaab Nahi.

Ghairmuqallid: Khulasah ye hai ke Ghair-Musalman ke Liye Isaale sawaab karna jayez nahi!

Sunni:  Jee Janab. Ab aapko baat samajh Ayee. Aur Aapke Jamat mai jo fout hojate hai wo Musalman hote hai ya…..?

Ghairmuqallid: Jee Jee Musalman hote hai bhai! Mai bila-wajah Waswasa ka Shikaar hogaya tha. Kia Aap Maiyyet ko Sawaab pohchane ka kuch aur bhi tareeqa batasakte hai?

Sunni: Jee bilkul. Ghairmuqallid Hafeez Sanaullah Madani Sahab ek sawal ke jawab mai likhte hai:

“Maiyet ke liye Dua Istagfaar Karna, Qur’bani dena aur bila Ta’een ke Sadqah Khairat karna waghera Sab Masr’ooh Amoor hai.” [Fataawa-Sanaiyya-Madniyya p.624/1]

Isaal-e-Sawwab Chand Tareeq’ay

Isaal-e-Sawwab Ke Chand Tareeq’ay

Ye wo chand tareeq’ay hai jinke zariye Mur’doh ko Sawaab pohchaya jasakta hai.

Ghairmuqallid: Jazak’Allah

Sunni: Ab Apne ‘Shaykh Chilli Sahab’ ko bhi ye samjhana ke Ikhlaas Niyat ke Saath, beghair Rasm-Riwaz ke, bila-Uzrat Isaale Sawaab karne se uska faidah yani Sawaab Marhoom ko pohocta hai.

Ghairmuqallid: Jee Aapne Sahih farmaya. Ab chalta hu bhai. Assalamu’alaikum Warahmatullahhi Wabarakatuh.

Sunni: Wasalamu’alaikum Warahmatullahi Wabarakatuh

NOTE:

(1)  Isaale Sawwab Ke Munkir Firqa Mu’tazila ke barey mai Tafseel ke liye dekhye Bahrur Raaiq, Fathul Qadeer waghera.

(2) Nichay “Isaale Sawwab” Ke Unwaan per articles ke link diye gaye hai jaha Daleel ke saath Mas’ala tafseel se bayan gaya hai. Aakhir mai Ek Kitab ka link bhi hai.

Allah Rabbul Izzat Hum sab ko Gumrahi se Bachaye aur Deen Ki Sahih Samajh Taufeeq Ata farmaye. Aameen.

Min-Jaanib:

Abdullah Islam

Articles

Urdu 

English

Books

Esaal-e-Sawab Bil Quran

Advertisements
This entry was posted in General and tagged . Bookmark the permalink.

2 Responses to Isaal-e-Sawaab per Ek Mukhtasar Mukaalma

  1. maulana husain says:

    Hazrat Al-Lajlaaj could you type this name in Arabic language?

Comments are closed.